५ हजारभन्दा बढी अमेरिकी डलरको मुद्रा सटही गर्नु परेमा प्यान नम्बर चाहिने भएको छ।
राष्ट्र बैंकले बैंक तथा वित्तीय संस्थाहरुलाई निर्देशन जारी गर्दै ५ हजारभन्दा बढी अमेरिकी डलरको जुनसुकै मुद्रा सटही गर्ने नेपालीसँग प्यान नम्बर अनिवार्य लिन भनेको छ।
यस्तो प्यान नम्बर उपरोक्त सम्बनधमा सटही माग गर्ने व्यक्ति वा निजको एकाघर परिवारका सदस्यहरुमध्ये आमा वा बुबा कुनै एकको भए पनि सटही सुविधा प्रदान हुनेछ।
शिक्षा, स्वास्थ्य, आप्रवासन लगायत प्रयोजनका लागि ५ हजारभन्दा बढी अमेरिकी डलर साट्न पाइने व्यवस्था छ। यसअघि प्रयोजन खुलाएपछि सटही सुविधा पाइने व्यवस्था थियो।
विदेश भ्रमणमा जानेहरुले भने १५ सय अमेरिकी डलरसम्मको सटही सुविधा पाउँछन्।
पछिल्लो समय विदेशी बिनिमय सञ्चिति घटेसँगै राष्ट्र बैंकले डलर सटहीमा कडा व्यवस्था गरेको हो। विदेश भ्रमणमा जानेले २५ सय अमेरिकी डलरसम्म सटही सुविधा पाउने व्यवस्थालाई कात्तिकदेखि घटाएर १५ सय कायम गरिएको थियो।
राष्ट्र बैंकको तथ्यांकअनुसार अमेरिकी डलरमा मुद्रा सञ्चिति २०७५ असार मसान्तसम्म १० अर्ब ८ करोड रहेकोमा ७.९ प्रतिशतले कमी आई मंसिर मसान्तमा ९ अर्ब २९ करोड रहेको छ।