यातायात व्यवस्था विभागले अबको २ दिन भित्र सवारी चालक अनुमती पत्र (स्मार्ट कार्ड) छाप्ने मासप्रिन्टरको सम्झौता गर्ने भएको छ।
सबै तयारी पूरा भइसकेकोले १,२ दिनमै मासप्रिन्टर र कार्ड ल्याउने जिम्मा पाएको मद्रास सेम्युरिटी प्रिन्टर्ससगँ सम्झौता गरिने विभागमा महानिर्देशक कुमार दाहालले जानकारी दिए।
‘आसयपत्र लगाएत सम्पूर्ण कार्य पूरा भइसकेको छ। अढाई महिना भित्र छपाई सुरु हुने गरि काम अगाडि बढाउछौ,’ दाहालले सेतोपाटीसगँ भने ‘लाइसेन्स छपाई सुरु भएपछि दैनिक ८ हजारको दरले २ महिनामा ब्याकलक हट्छ त्यसपपछि प्रकृया पूरा गरेकाले १ हप्ता भित्र लाइसेन्स पाउनुहुन्छ।’
विभागले १० लाख कार्ड र एउटा मास प्रिन्टर ल्याउन लागेको हो। हाल प्रकृया पूरा गरेका करिव ५ लाख सवारी चालक रसिदकै भरमा सवारी चलाउन बाध्य छन्।
हाल विभागमा सातवटा मेसिनबाट दैनिक ३ हजार वटा लाइसेन्स छापाई हुन्छ। हालसम्म करिव ८ लाख ५५ हजारले स्मार्ट कार्ड पाइसकेको विभागले जनाएको छ।