रुपन्देहीको सदरमुकाम भैरहवामा निर्माणाधीन गौतमबुद्ध अन्तर्राष्ट्रिय विमानस्थलको धावनमार्गमा लाइटिङ र मार्किङको काम सुरू गर्ने तयारी गरिएको छ।
निकै कठिनाइबीच धावनमार्गको कालोपत्रे सम्पन्न भएपछि अब लाइटिङ र मार्किङको काम सुरू गर्ने तयारी गरिएको आयोजनाले जनाएको छ।धावनमार्गमा लाइटिङ र मार्किङको कामका लागि थाइल्याण्डको एरो थाइ कम्पनीसँग ठेक्का सम्झौता भइसकेको आयोजनाले जनाएको छ।
लाइटिङ र मार्किङको लागि एरो थाइ कम्पनीसँग ५५ करोडमा ठेक्का सम्झौता भइसकेको आयोजना प्रमुख प्रवेश अधिकारीले जानकारी दिए।
ठेक्का सम्झौता भइसकेपछि एरो थाइ कम्पनीले आवश्यक उपकरण जडानको तयारी समेत थालेको छ। अधिकारीले आठदश दिन भित्र विभिन्न उपकरण जडानको काम सम्पन्न हुने बताए ।
विमानस्थलको अहिलेसम्म करिब ७३ प्रतिशत निर्माण सम्पन्न भइसकेको छ। २०१९ भित्रै सबै काम सम्पन्न गरी सन् २०२० को जुनदेखि अन्तर्राष्ट्रिय उडान भर्ने गरी तयारी भइरहेको आयोजना प्रमुख अधिकारीले बताए।
विमानस्थल सञ्चालनको मुख्य आधार मानिने धावनमार्गको कालोपत्रे सकिएसँगै अब अन्य संरचनाको काम पनि धमाधम थालिएको छ। तोकिएको समयभन्दा करिब २ महिना ढिलो गरेर भए पनि विमानस्थलको धावनमार्ग कालोपत्रेको काम सम्पन्न भएको हो।
विमानस्थलको तीन किलोमिटर धावनमार्गको कालोपत्रे ४ महिनाभित्रै सक्ने लक्ष्य राखिए पनि ६ महिना लगाएर कालोपत्रे गरिएको हो। बेलाबेलामा नदीजन्य पदार्थ र पेट्रोलियम पदार्थको अभाव तथा प्रतिकूल मौसमले गर्दा लक्ष्य २ महिना पर धकेलिएको अधिकारीले बताए।
आयोजना प्रमुख अधिकारीका अनुसार साढे सात सेन्टिमिटरको चार तहमा कालोपत्रे गरिएको धावनमार्गको मोटाइ ३० सेन्टिमिटर रहेको छ।
ट्याक्सी वे को काम पनि चार तहकोमध्ये तीन तहको काम सम्पन्न भएको छ। ‘चार तहमध्ये कालोपत्रेको काम सुरू हुँदैछ भने एप्रोनको काम पनि सकिएको छ’, अधिकारीले भने।
राष्ट्रिय गौरवको आयोजना अन्तर्गत निर्माण भइरहेको विमानस्थल चिनियाँ कम्पनी नर्थ वेस्ट सिभिल एभिएसनले निर्माण गरिरहेको छ। आयोजना अनुसार अहिले रहेको पुरानो विमानस्थलको धावनमार्गलाई ट्याक्सी वे बनाउने उद्धेश्य छ।
विमानस्थलमा अहिलेसम्म जहाज पार्किङ निर्माण सम्पन्न भइसकेको छ भने टर्मिनल भवन, कन्ट्रोल टावर, पानी ट्यांकी तथा अन्य आवश्यक पूर्वाधार निर्माणको काम भने जारी छ।
अन्तर्राष्ट्रिय नागरिक उडड्यन संगठनको मापदण्ड अनुसार यो विमानस्थल ‘फोर इ’ स्तरको विमानस्थल हो। वार्षिक ६० लाख यात्रु व्यवस्थापन गर्न सकिने लक्ष्यसहित यो विमानस्थल निर्माण भइरहेको छ।
