चिकित्सा शिक्षा विधेयकमा आफूसँग भएको सहमतिअनुसार व्यवस्था हुनुपर्ने लगायत माग राखेर १२ दिनदेखि अनसनरत डाक्टर गोविन्द केसीले माग पूरा नहुञ्जेल सत्याग्रह जारी रहने बताएका छन्।
आइतबार आइसियूबाट वार्डमा सारिएपछि सञ्चारकर्मीसँग बोल्दै उनले सो कुरा बताएका हुन्।
उनले भने, ‘जबसम्म माग पूरा हुँदैन, सत्याग्रह जारी रहन्छ।’
सरकारले आफूलाई मात्र नभएर ३ करोड नेपाली जनतालाई धोका दिएको उनले जिकिर गरे।
शीर्षस्थ नेताहरूले लुटेको कालो धन सेतो गर्नलाई ३ करोड जनतालाई धोका दिएको केसीको आरोप छ।
‘सरकारले हाम्रो अभियानलाई धोका दिएको होइन’,उनले भने, ‘३ करोड नेपाली जनतालाई धोका दिएको हो।’
प्रधानमन्त्रीले सम्झौता कार्यान्वयनमा बेइमानी गरेको उनले बताए।
‘ओली जीको बेइमानी हो’,उनले भने,‘सम्झौता गरेपछि पालना गर्नुपर्ने हो नि।’
उनले पछिल्लो मागसँगै आफ्नो अर्को माग पनि अगाडि सारेका छन्।
उनले द्वन्द्वकालमा मानवता विरोधी अपराध गर्नेलाई अन्तर्राष्ट्रिय कानुनअनुसार कारबाही हुनुपर्ने माग अगाडि सारेका हुन्।