प्रधानमन्त्री केपी शर्मा ओलीले नेपाललाई निरक्षरहरूको होइन विद्वानहरूको देश बनाउनुपर्ने बताएका छन्।
विद्यालय भर्ना अभियानका सन्दर्भमा आज बालुवाटारमा नेकपा निकट युवा र विद्यार्थीहरूसँग अन्तर्क्रिया गर्दै प्रधानमन्त्री ओलीले सो कुरा बताएका हुन्।
‘नेपाललाई निरक्षरहरूको होइन,विद्वानहरूको देशको रूपमा पहिचान बनाउनु पर्दछ’, प्रधानमन्त्री ओलीले भने, ‘हाम्रा विद्वान पुर्खाको जेनेटिक मेमोरीको उपायोग हामीले गर्नु पर्दछ। विद्वान पुर्खाका सन्तान हामी केही समय निरक्षर रह्यौं तर अब यो अवस्था रहिरहन सक्दैन।’
प्रधानमन्त्री ओलीले बालबालिका विद्यालय भर्नाका लागि अभिभावक सचेतना सञ्चालन गर्नुपर्ने बताए।
‘शिक्षाको महत्व अभिभावकलाई बुझाउनु पर्दछ’, उनले भने, ‘त्यसपछि मात्र उनीहरूलाई छोराछोरी पढ्न पठाउँछन्।’
प्रधानमन्त्री ओलीले युवा र विद्यार्थीहरूले अब सृजनशील र समाज सुधारको काममा लाग्नका लागि कुनै अवरोध नरहेको स्पष्ट पारे।
प्रधानमन्त्री ओलीले अहिले आन्दोलनको स्वरूप फेरिएको स्पष्ट पारे।
‘अब राजनीतिक संघर्ष र आन्दोलन गर्नुपर्ने दिन सकिएका छन्’,उनले भने, ‘अब युवाहरूले समाज सुधारका लागि शिक्षा,स्वास्थ्य,श्रम,सीप र उत्पादन जस्ता कुरामा ध्यान दिनुपर्दछ।’
गत वर्षदेखि विशेष रूपले सुरू गरिएको विद्यार्थी भर्ना अभियानलाई घरघरमै गएर सञ्चालन गर्न प्रधानमन्त्री ओलीले विद्यार्थी र युवाहरूलाई आग्रह गरेका छन्।
‘विकास र समृद्धिको महत्वपूर्ण माध्यम शिक्षा हो। हामीले समृद्धि हासिल गर्नका लागि शिक्षाको स्तर उठाउनु पर्दछ। यसका लागि तपाईंहरूको भूमिका महत्वपूर्ण हुन्छ। यस वर्षदेखि विद्यालय उमेरका कोही बालबालिका पनि विद्यालय बाहिर हुनुहुँदैन’, प्रधानमन्त्री ओलीले भने।