आर्थिक वर्ष २०७६/०७७ को लागि प्रदेश नं ५ सरकारको नीति कार्यक्रम प्रदेश प्रमुख उमाकान्त झाले प्रदेशसभामा प्रस्तुत गरेकोमा धन्यवाद प्रस्ताव पारित गर्दै प्रदेशसभाको शुक्रबारको बैठक सम्पन्न भएको छ।
प्रदेशसभा सदस्य भूमिश्वर ढकालको प्रस्ताव र अर्का प्रदेशसभा सदस्य सहसराम यादवले समर्थन गरेको उक्त धन्यवाद प्रस्ताव सर्वसम्मतले पारित भएको हो।
बैठकमा मुख्यमन्त्री शंकर पोखरेलले प्रदेश प्रमुख उमाकान्त झाले बिहीबार प्रस्तुत गरेको प्रदेश सरकारको नीति कार्यक्रमको प्रतिलाई प्रदेशसभामा पेश गरेका थिए।
त्यस्तै, शुक्रबारको बैठकमा प्रदेश सरकारका भौतिक पूर्वाधार विकास मन्त्री बैजनाथ चौधरीले सडक, सवारी, यातायात तथा परिवाहन सम्बन्धमा व्यवस्था गर्न बनेको विधेयक प्रस्तुत गरेका थिए।
प्रदेश सरकारको आर्थिक वर्ष २०७६/०७७ को लागि प्रस्तुत गरिएको नीति कार्यक्रममाथि संशोधनको सूचना दर्ताको लागि जेठ १२ गते दिनको १२ बजेसम्मको समयअवधि दिइएको छ।
अर्को बैठक १२ गते दिनको २ बजे बस्ने गरी शुक्रबारको बैठक स्थगित भएको हो। दिउँसो सवा १ बजे सुरू भएको बैठक १० मिनेट मात्रै बसेको थियो।
