प्रदेश २ को मुख्यमन्त्री लालबाबु राउतले बाढीबाट पीडित भएकाहरूका लागि राहतमा जुट्न निर्देशन दिएका छन्।
आइतबार सुरक्षा निकायका प्रमुखको बैठकमा प्रदेशमा बाढीबाट पीडित भएकाहरूको जीउधनको रक्षाका तत्कालै राहतमा जुट्न मुख्यमन्त्री राउतले निर्देशन दिएका हुन्।
बैठकमा सुरक्षा निकायका प्रमुखले प्रदेशमा बाढीबाट भएको क्षतिको सम्बन्धमा जानकारी गराएका थिए।
विपद् व्यवस्थापनमा खटिएको सुरक्षा निकायको लागि लाइफ ज्याकेट, सोलार चार्जर उपकरण, रबर बोटलगायतको उद्धार सामग्रीको व्यवस्थापन गर्नुपर्ने सुरक्षा निकायका प्रमुखहरूले धारणा राखेका छन् ।
बैठकमा प्रमुख सचिव दीपक सुवेदी, मन्त्रालयहरूका सचिव, नेपाली सेना, सशस्त्र प्रहरी, नेपाल प्रहरी, राष्ट्रिय अनुसन्धान विभागका प्रदेश प्रमुखहरूको उपस्थिति थियो।
