सत्तारूढ नेपाल कम्युनिष्ट पार्टी (नेकपा) संसदीय दलका मुख्य सचेतक देवप्रसाद गुरूङले तत्काल सभामुखका लागि निर्वाचन हुने सम्भावना नरहेको बताएका छन्।
संविधानअनुसार सभामुख र उपसभामुख फरक/फरक दलको हुनुपर्ने भएको र त्यो मुद्दा सर्वोच्च अदालतमा विचाराधीन नै रहेको अवस्थामा अहिले निर्वाचन हुने सम्भावना नरहेको उनले बताए।
सभामुख निर्वाचनका लागि उपसभामुखले राजीनामा दिनुपर्ने पनि उनले तर्क गरे।
आइतबार काठमाडौंमा भएको एक कार्यक्रममा गुरूङले भने, ‘संविधानले सभामुख र उपसभामुख फरक/फरक दलको हुनुपर्ने व्यवस्था गरेको छ। यस्तो अवस्थामा दुवै पद खाली नभई सभामुखको निर्वाचन गर्न मिल्दैन।’
सभामुखको निर्वाचन गर्ने अवस्था नै नरहेको बेला आकांक्षी को छ भनेर प्रश्न गर्नु नै स्वभाविक नभएको उनले बताए।
सभामुख र उपसभामुख दुवै पद खाली भएमा दलहरूबीच सहमतिको आधारमा उम्मेदवार तय गरी निर्वाचन गर्न सकिने गुरूङको भनाइ छ।