प्रधानमन्त्री केपी शर्मा ओलीले आफ्नो एउटा सपना बारम्बार दोहोर्याइरहन्छन्-हिमाल छेडेर तीव्र गतिको रेल ल्याउने अनि नेपालको पानीजहाज चलाउने।
रेल र पानीजहाजको सपना उनी आफैं कार्यान्वयन गर्न भने सक्दैनन्। ओली सपनालाई कार्यान्वयन तहमा पुर्याउन काम गर्ने मन्त्रालय हो- भौतिक पूर्वाधार तथा यातायात।
विकट गाउँमा पुल र राजधानीका सडकका खाल्डा पुर्ने जिम्मा पनि भएको भौतिक मन्त्रालयमा सबैभन्दा धेरै बजेट हुन्छ।
डेढ वर्ष भौतिक मन्त्रालय चलाएका रघुवीर महासेठको कार्यसम्पादन राम्रो नभएको भन्दै प्रधानमन्त्री ओलीले हटाएका छन् र आफ्नो सपनाको एक महत्वपूर्ण सारथी बसन्तकुमार नेम्वाङलाई बनाएका छन्।
सामान्यत: मन्त्रीले पदभार सम्हालेको दिन यो गर्छु र त्यो गर्छु भनेर योजना सुनाउँछन्।
बिहीबार पदभार सम्हालेका नवनियुक्त भौतिक पूर्वाधार तथा यातायात मन्त्री नेम्वाङले कुनै महत्वकांक्षी योजना सुनाएनन्। बरू उनले आफू मन्त्रालयमा नयाँ भएको र कर्मचारीसँग ब्रिफिङ लिएर अगाडि बढ्ने प्रतिक्रिया दिए।
नेम्वाङले पदभार सम्हाल्नुअघि मन्त्रालयमा प्रगति नै प्रगति भएको भएको भनेर निवर्तमान मन्त्री महासेठले आफूले गरेको कामको फेहरिस्त सुनाएका थिए।
महासेठलाई बिदाइ गर्ने कार्यक्रममा कर्मचारीले समेत २० महिनासम्म सफल नेतृत्व प्रदान गरेको भनेर महासेठको प्रशंसा समेत गरे।
महासेठले आफ्ना उत्तराधिकारीका रूपमा आएका मन्त्री नेम्वाङले आफूले छोडेका अधुरा कामलाई पूरा गर्ने बताए तर आफू मन्त्रीबाट हट्नुको कारण भने खुलाएनन्।
महासेठले राम्रैराम्रा काम गरेको बताए पनि तथ्यांकले त्यसलाई पुष्टी गर्दैन।
चालु आर्थिक वर्षमा भौतिक मन्त्रालयसँग १ खर्ब ५६ अर्ब बजेट छ। जसमध्ये पुँजीगत बजेट १ खर्ब ४४ अर्ब छ। पहिलो चौमासिकमा ६ प्रतिशतमात्रै विकास बजेट खर्च भएको छ जबकी पुँजीगत खर्चको झन्डै आधा बजेट भौतिकसँगै हुन्छ।
मन्त्रालयको यही अवस्था बुझेका नवनियुक्त मन्त्री नेम्वाङले हतारिएर जवाफ दिएनन्। पत्रकारका प्रश्न, सडकका खाल्डाखुल्डी अनि सडक निर्माणमा भएको ढिला सुस्ती ठेकेदारको लपराबाही सुधार्ने योजना के छ भन्नेमै केन्द्रित थिए।
जवाफमा मन्त्री नेम्वाङले भने- मेरा प्राथमिकताबारे कुनै रेडिमेट सोच छैन। यो मन्त्रालयमा प्रवेश नगरे पनि काठमाडौंका समस्या देखेको छु। काठमाडौंका सडक हेर्ने अरू निकाय पनि छन्। ठूला सडकमा पिच उप्किने, धुलो उड्ने समस्या छ। यसलाई चाँडोभन्दा चाँडो समाधान गर्न धेरै समस्या छ जस्तो लाग्दैन।
एक्लैले केही गर्न नसक्ने भन्दै उनले कर्मचारीसँग छलफल गरेर मात्रै आफ्नो योजना बनाउने सुनाए।
‘म अहिले प्रवेशमात्रै गरेको छु। म प्राविधिक पनि होइन,’ उनले भने,‘हुनपर्ने काम भएको छ की छैन। जवाफदेहिता पुग्यो कि पुगेन भनेर हेर्छु। आवश्यक नीति बनाएर मन्त्रालयका समस्यालाई सहजीकरण गर्ने र त्यसलाई एकीकरण गरेर प्रगित हासिल गर्न मलाई पठाइएको छ।’
‘समृद्ध नेपाल, सुखी नेपाली’ नारालाई पूरा गर्न यो सराकारसँग मोटामोटी तीन वर्ष बाँकी छ।
प्रधामन्त्री केपी ओलीका महत्वकांक्षी योजना कार्यान्वयन गर्न नेम्वाङ प्रमुख सारथी बन्न सक्लान्?
‘बसन्त पार्टीले दिएको जस्तो जिम्मेवारी पनि पूरा गर्ने व्यक्ति हुन। त्यही भएर भौतिकमा खस्किएको साख जोगाउन उनलाई लगिएको हो,’ प्रधामन्त्री ओली निकटका एक नेताले भने,‘प्रधानमन्त्रीले धेरै सोचेर नै यो जिम्मेवारी दिनुभएको हो।’
‘लो प्रोफाइल’ मा बस्न रूचाउने नेम्वाङले सबैभन्दा ठूलो बजेट भएको मन्त्रालय कसरी पाए?
२०४८ सालको पहिलो संसदीय निर्वाचनमै पाँचथरबाट सांसद बनेका नेम्वाङ पार्टीका लागि त्याग गरेका नेता हुन्।
२०५६ को संसदीय निर्वाचनमा पनि उनले जित हात पारेका थिए। कानुनी पृष्ठभूमिका नेम्वाङ २०४८ को निर्वाचनभन्दा पहिला सोल्टी होटलमा काम गर्थे। तत्कालीन नेकपा एमालेले निर्वाचनमा उमेदवार बन्न भनेपछि २९ वर्षीय वसन्त उमेदवार बने, निर्वाचन जिते पनि।
त्यसयता निरन्तर पार्टीका लागि इमान्दार भएर खटिएका मात्रै होइन लिम्बुवान र माओवादीको दबदबा रोक्न समेत अहोरात्र खटिएको नेकपाका एक नेताले सेतोपाटीलाई बताए।
नेम्वाङ नेकपा संसदीय दलका उपनेता सुवास नेम्वाङ निकट मानिन्छन्। उनीहरू नातेदार हुन्। मन्त्रीको सपथ लिएलगत्तै उनी सुवास नेम्वाङलाई भेटन पुगे। त्यही भएर पदभार सम्हाल्न उनी ढिला मन्त्रालय पुगेका थिए। भौतिक मन्त्रालय पुगेका नेकपा कार्यकर्ता बसन्तको सन्तुलित अभिव्यक्तिको पछि सुवास नेम्वाङको सुझाव रहेको कुरा गर्दै थिए।।
बसन्त नेम्वाङले यसअघि पनि प्रधानमन्त्री ओलीसँग निकट भएर काम गरिसकेका छन्। २०७२ सालमा प्रधानमन्त्री भएका बेला ओलीले उनलाई प्रशासनिक सल्लाहकार बनाए थिए। त्योबाहेक उनले अरू राजकीय पद सम्हालेका छैनन्।
डेढ वर्षअघि धेरैलाई पछि पार्दै भौतिक मन्त्रीको जिम्मा पाएका इन्जिनियर पृष्ठभूमिका रघुवीर महासेठ प्रधानमन्त्रीको नजरमा असफल सावित भएका छन्। महासेठका उत्तराधिकारी बनेका कानुनी पृष्ठभूमिका बसन्त नेम्वाङको परीक्षा आजैदेखि सुरू भएको छ।
