काठमाडौंबाट पैदल यात्रामा निस्किएका बुद्धका अनुयायी भिक्षुहरु १८ दिनको पैदल यात्रापछि बुद्धजन्मस्थल लुम्बिनी पुगेका छन्। विश्व शान्तिको कामना गर्दै काठमाडौंबाट पैदल यात्रामा निस्किएका भिक्षुहरु लुम्बिनी पुगेका हुन् ।
विश्वमा शान्तिको कामना गर्दै थाइल्याण्ड, रसिया, भारत र नेपालका गरी ५५ जना भिक्षुको टोली लुम्बिनीसम्म शान्ति पदयात्रामा निस्किएका थिए ।
गौतम बुद्धले ४५ वर्षसम्म हिँडेर विश्वमा शान्तिको प्रचार गरेकाले त्यसको स्मरणमा आफूहरु पैदल यात्रामा निस्किएको भिक्षुहरुले बताएका छन् । भिक्षुहरुले सबै प्राणी सुखि होस, बाधा अड्चन नआओस भनेर पैदल यात्रामा निस्किएको बताए ।
भिक्षुहरु प्रत्येक दुई वर्षमा शान्ति पद यात्रा गर्दै लुम्बिनी आउने गरेका छन् । विगतका वर्षहरुमा भिक्षुहरुले बुद्धले ज्ञान प्राप्त गरेको स्थल भारतको बोधगयाबाट लुम्बिनीमा आउने गरे पनि यसपटक भने काठमाण्डौँबाट लुम्बिनी आएका हुन् ।
उनीहरु मंगलबार बुद्धनगरी तिलौराकोट जाने कार्यक्रम रहेको छ। बिश्वमा शान्तिको कामना गर्दै बुद्धको पाइलालाई आफुहरुले साथ दिएर पैदल यात्रामा निस्किएको पैदल यात्रामा सहभागि लुम्बिनी विश्वविद्यालयका उपप्राध्यापक भिक्षु वजिरले बताए ।
१८ दिन अगाडि काठमाडौंबाट निस्किएका ५५ जना भिक्षुको टोली काठमाडौं, थानकोट, चित्लाङ, चन्द्रगिरीडाँडा, कुलेखानी, हेटौडा, नारायणघाट, दाउन्ने, रामग्राम, भैरहवा हुँदै लुम्बिनी आएका हुन् ।
आईतवार रामग्राम आईपुगेका उनीहरु बुद्धको अस्तु रहेको स्थान रामग्राममा रातभर ध्यान गरेर बसेको सिद्धार्थ बौद्ध समाजका अध्यक्ष सुवर्णमुनि शाक्यले जानकारी दिए । राम्रगामबाट सोमबार बिहान ४ बजे पद यात्रामा निस्किएका उनीहरु बिहान १० बजे भैरहवामा आईपुगका थिए। रामग्रामदेखि भैरहवा सम्मको दुरी झण्डै २२ किलोमिटरको पर्छ । भैरहवा आइपुगेका भिक्षुहरुले भैरहवा नगर परिक्रमा गरेका थिए ।
पद यात्रामा रहेका थेरावादी समुदायका यी भिक्षुहरु अधिकांश समय जंगलमा बिताउने, जंगलमा पाइने जडीबुटी तथा फलफुल सेवन गर्ने गर्दछन् । आफ्नो उपचार पनि यी भिक्षुहरुले आयुर्वेदिक पद्धतिबाट गर्छन् ।
पछिल्लो समय बुद्धजन्मस्थल लुम्बिनीमा विभिन्न संघसंस्थाहरुले आध्यात्मिक कार्यक्रम गर्ने क्रम बढेसँगै पर्यटक आगमनमा समेत बृद्धि हुँदै गएको छ ।