प्रदेश सरकारले चीनबाट गाई ल्याउन लागेको भन्दै यहाँको स्थानीय युवाले विरोध जनाएका छन्। सर्लाहीको सदरमुकाम मलंगवामा बुधबार स्थानीय जनजागृति युवा क्लबका अध्यक्ष सागर यादवको नेतृत्वमा जम्मा भएका युवाले चीनबाट गाई ल्याउन लागिएको विरोध जनाए।
उनीहरूले 'विदेशी गाई चाहिँदैन', 'नेपाली कृषकमाथि खेलवाड गर्न पाइँदैन' जस्ता नारासमेत लगाएका थिए। चीनबाट गाई ल्याउन प्रदेश २, प्रदेश ३ र गण्डकी सरकारले यसअघि नै सम्झौता गरिसकेका छन्। सबैभन्दा पहिले प्रदेश ३ को सरकारले नेपाललाई दुधमा आत्मनिर्भर बनाउन भन्दै चार हजार गाई चीनबाट ल्याउने सहमति गरेको थियो।
चीनबाट गाई ल्याउने निर्णयको विरोधमा यसअघि पनि प्रदेश २ को अस्थायी राजधानी जनकपुरमासमेत स्थानीय युवा व्यवसायीले विरोध जनाएका थिए। चीनसँग मिलेर प्रदेश २ सरकारले कृषि परियोजना चलाउन लागेको भन्दै राजबिराजमा पनि यसअघि प्रदर्शन भएको छ।