रुपन्देहीको तिलोत्तमा नगरपालिकाबाट अपहरणमा परेकी ६ वर्षीया बालिकाको तीन दिनपछि सकुशल उद्धार भएको छ।
जिल्ला प्रहरी कार्यालय रुपन्देहीका अनुसार गत सोमबार साँझ ८ बजेतिर तिलोत्तमा नगरपालिका वडा नं. १२ का टेक बहादुर थापाकी ६ वर्षीया छोरी सावित्री थापा अपहरणमा परेकी थिइन्।
बुवा टेकबहादुर थापा घरमा नभएको बेला आमा मञ्जुसँगै रहेकी सावित्रीलाई पर्सा जिल्लाको वीरगञ्ज महानगरपालिका २७ मा बस्ने ३८ वर्षीय जयराम दासले अपहरण गरी लुकाइछिपाइ राखेकोमा बुधबार बिहान प्रहरीले उद्धार गरेको हो।
बालिका सोमबार साँझ अपहरणमा परे पनि प्रहरीलाई भने मंगलबार दिउँसो मात्र जानकारी गराइएको ईलाका प्रहरी कार्यालय बुटवलका प्रहरी नायब उपरीक्षक भीमलाल भट्टराईले बताए।
बालिका अपहरणमा परेको जानकारी पाउनासाथ खोजी कार्यमा खटिएको प्रहरीले बुधबार बिहान साढे ७ बजे बुटवल उपमहानगरपालिका वडा नं.५ स्थित होटल बुटवल प्लाजा ऐण्ड रेष्टुरेण्टबाट उद्धार गरेको हो।
प्रहरी नायब उपरीक्षक भट्टराईले उक्त रेष्टुरेण्टको कोठा नं. १०३ मा लुकाइ राखेको अवस्थामा बालिकालाई फेला पारी सकुशल उद्धार गरिएको र बालिका अपहरण गर्ने जयराम दासलाई पक्राउ गरिएको जानकारी दिए।
बालिका अपहरण गर्ने जयराम दासले विगत नौ महिनादेखि पीडितको घर नजिकै रैनी खोलामा पुल बनाउने पेटी ठेकेदारको रूपमा काम गर्दै आएको प्रहरीले जनाएको छ।
प्रहरीले घटनाको थप अनुसन्धान गरिरहेको जनाएको छ।