सल्यानको कुपिण्डे दहमा डुबेर एक जना व्यक्ति बेपत्ता भएका छन्।
वनगाड कुपिण्डे नगरपालिका वडा नं. ८ निवासी अन्दाजी ३६ वर्षीय गोकुल बुढा सोमबार साँझ पौडी खेल्ने क्रममा डुबेका थिए।
जिल्ला प्रहरी कार्यालय सल्यानका प्रमुख वीरेन्द्रबहादुर शाहीले बुढाको खोजी भइरहेको जानकारी दिए। ‘हामीले हिजो खोज्यौं र आज पनि प्रयास जारी छ,’ डिएसपी शाहीले भने।
डुबेका व्यक्तिको खोजीको लागि गोताखोर बोलाउन केन्द्रमा पत्रचार गरिएको डिएसपी शाहीले बताए। ‘डुबेको व्यक्ति पानीमा उत्रिन्छ कि भन्ने आशा गरिएको भए पनि त्यसो नभएको हुँदा खोजीको लागि गोताखोर मागेका छौं,’ डिएसी शाहीले भने।
स्थानीय बुढा सोमबार बेलुका गर्मी छल्न भन्दै साथीहरू सँगै नुहाउन तालमा पसेका थिए। ताल ६९ मिटरसम्म गहिरो छ। पौडी खेल्न जान्ने स्थानीय युवाहरूले भने तालमा दिनहुँ जसो नुहाउने गर्छन्। तालमा पर्यटकका लागि २१ वटा डुङ्गा सञ्चालन हुँदै आएका छन्।
