विपन्न परिवारका लागि झापाको अर्जुनधारा नगरपालिकामा ३३ घर निर्माणको काम सुरु भएको छ।
प्रदेश सरकारअन्तर्गत भौतिक पूर्वाधार विकास मन्त्रालयको शहरी विकास तथा भवन कार्यालय इलामले लक्षित वर्ग कार्यक्रमअन्तर्गत घर निर्माणको काम सुरु गरेको हो।
घर निर्माणका लागि एक करोड नौ लाख ७२ हजार पाँच सय रुपैयाँ बजेट विनियोजन भएको प्रदेश नं १ का प्रदेशसभा सदस्य वृख प्रधानले बताए।
'लक्षित वर्ग कार्यक्रमअन्तर्गत बन्ने घर भूकम्प प्रतिरोधात्मक हुन्छन्, एउटा घर निर्माणका लागि तीन लाख २५ हजार रुपैयाँ खर्च हुन्छ,' अर्जुनधारा नगरपालिका–८ स्थित प्रज्वल साहको घर शिलान्यास गर्दै प्रधानले भने।
आर्थिक वर्ष २०७६/७७ को सङ्घीय सरकारद्वारा विनियोजित बजेटबाट २८ र प्रदेश सरकारबाट पाँच गरी अर्जुनधारा नगरपालिकाभित्र ३३ घर निर्माणको काम सुरु भएको उनले जानकारी दिए।