प्रधानमन्त्री कप एक दिवसीय राष्ट्रिय क्रिकेट प्रतियोगितामा राष्ट्रिय टिमका कप्तान पारस खड्का नेतृत्वको प्रदेश नम्बर ३ विभागीय टिम एपीएफसँग ४१ रनले पराजित भएको छ।
शनिबार कीर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको एपीएफले पूरै ५० ओभर खेल्दै ९ विकेट गुमाएर २८८ रन बनायो।
एपीएफले दिएको २ सय ८९ रनको लक्ष्य पछ्याएको प्रदेश ३ निर्धारित ओभरमा ९ विकेट गुमाएर २ सय ४७ रनमात्र बनाउन सक्यो।
पिएम कपको तेस्रो संस्करणमा पहिलो शतक प्रहार गर्ने ज्ञानेन्द्रले ८ चौका र ५ छक्का प्रहार गरे पनि उनले जित दिलाउन सकेनन्।
कप्तान खड्का ४६ रनमा आउट भएको खेलमा ज्ञानेन्द्रले १ सय १७ रनको शानदार शतकीय इनिङ खेले।
ओपनर रित गौतमले २७ र इशान पाण्डेले १२ रन बनाउनु बाहेक अन्यले दोहोरो अंकको स्कोर छुन सकेनन् ।
एपीएफका कमलसिंह ऐरीले ३ तथा अविनाश बोहराले २ विकेट लिए। पृथु बाँस्कोटा र भुवन कार्कीले समान १-१ विकेट हात पारे ।
एपीएफका सुमितले ९४ रनको योगदान दिए। १०३ बलको सामना गरेका सुमितले ५ चौका र ६ छक्का प्रहार गरे।
पृथुले ५८ बलको सामना गर्दै ३ चौका र १ छक्कासहित ५९ रन बनाए । यस्तै प्रदीप सिंह ऐरीले ४० रन जोड्दा अमर सिंह रौटेलाले अविजित २७ रन बनाए।
सबै तस्बिरहरू : निशा भण्डारी
