दीपक चाहरले विश्व कीर्तिमानी बलिङ गरेपछि भारतले बंगलादेशविरुद्धको तीन खेलको टी–२० सिरिज २–१ ले जितेको छ।
भारतले आइतबार नागपुरमा भएको तेस्रो तथा निर्णायक खेलमा चाहरको उत्कृष्ट बलिङको मद्दतमा बंगलादेशलाई ३० रन ले पराजित गरेको हो। यसअघि पहिलो खेलमा बंगलादेश विजयी हुँदा दोस्रो खेल भारतले जितेको थियो।
भारतले दिएको १७५ रनको लक्ष्य पछ्याउने क्रममा बंगलादेश ४ बल खेल्न बाँकी छदा १४४ रनमै अलआउट भयो। त्यसक्रममा भारतका चाहरले अन्तिम ३ विकेट लिने क्रममा ह्याट्रिक गरेका थिए। खेलमा उनले ६ विकेट लिन सफल भए।
६ विकेट लिने क्रममा केवल ७ रन खर्चिएका उनले विश्व रेकर्ड बनाए। टी–२० मा यो सबैभन्दा उत्कृष्ट बलिङ फिगर हो।
यसअघि उत्कृष्ट बलिङको रेकर्ड श्रीलंकाका अजन्था मेन्डिसको नाममा थियो। उनले सन् २०१२ मा जिम्बावेविरुद्ध ६ विकेट लिने क्रममा केवल ८ रन खर्चिएका थिए।
चाहर टी–२० अन्तर्राष्ट्रिय खेलमा ह्याट्रियक गर्ने पहिलो भारतीय खेलाडी समेत बनेका छन्। उनले विकेट १७.६ ओभरमा सैफुल इस्लामलाई ४ रनमा आउट गरे। यस्तै १९.१ ओभरमा मुस्ताफिजुर रहमानलाई १ रन र १९.२ ओभरमा अनिमुल इस्लामलाई ९ रनमा बोल्ड गरेपछि चाहरले लगातार ३ बलमा विकेट लिँदै ह्याट्रिक गरे।
चाहरसँगै शिभम् दुवेले ३ विकेट हात पारेका थिए। बंगालदेशका लागि मोहमद नइमले ४८ बलमा ८१ रन जोडे पनि अन्य ब्याट्सम्यान सस्तैमा आउट भए।
त्यसअघि पहिले ब्याटिङ गरेको भारतले ५ विकेटको क्षतिमा १७४ रन बटुल्दा लोकेश राहुल र श्रेयस इयरले अर्धशतक प्रहार गरे। राहुलले ३५ बलमा ७ चौकाको मद्दतमा ५२ रन र श्रेयस ३३ बलमा ३ चौका र ५ छक्काको मद्दतमा ६२ रनको योगदान दिए। मनिष पाण्डेले १३ बलमा नटआउट २२ रन बटुले।