मलेसियाको फुटबल लिग च्याम्पियन जोहर दारुल ता'जिम एफसीविरुद्धको मैत्रीपूर्ण खेलका लागि नेपाली राष्ट्रिय टिम घोषणा गरिएको छ।
फिफा विश्वकप २०२२ र एएफसी एसियन कप २०२३ को छनोट प्रतियोगिताको तयारीका लागि नेपालले जोहरविरुद्ध आगामी भदौ ९ गते मैत्रीपूर्ण खेल खेल्दैछ। सो खेलका लागि शुक्रबार नेपालले २३ सदस्यीय टिम घोषणा गरेको हो।
प्रशिक्षक योहान कालिनले घोषणा गरेको टिममा नियमित गोलकिपर किरण चेमजोङ छैनन्। किरण २ साताअघि जापानमा प्रशिक्षणका लागि गएका थिए। उनी विश्वकप छनोटका लागि टिममा फर्केने छन्।
यस्तै रोहित चन्द पनि मैत्रीपूर्ण खेलमा उपलब्ध नहुने भएका छन्। रोहित इन्डोनेसिया लिग खेलिरहेका छन्।
‘रोहित र किरण मैत्रीपूर्ण खेलमा उपलब्ध नभए पनि विश्वकप छनोट खेलका लागि भने उपलब्ध हुनेछन्’ राष्ट्रिय टिमका सहायक प्रशिक्षक किरण श्रेष्ठले सेतोपाटीसँग भने।
यता नियमित कप्तान विराट महर्जन भने टिममा पर्न असफल भएका छन्। २००८ मा राष्ट्रिय टिममा डेब्यू गरेका विराज नेपाली टिमका सिनियर खेलाडीमा पर्छन्।
तत्कालिन कप्तान सागर थापा म्याच फिक्सिङ काण्डमा मुछिएपछि विराजले नेपाली टिमको कप्तानी गर्दै आएका थिए। उनले नेपालका लागि ७२ अन्तर्राष्ट्रिय खेल खेलिसकेका छन्।
पछिल्लो समय विराजको फिटनेसमा समस्या देखिएको थियो। उनी टिममा परे पनि पहिलो रोजाइमा पर्न संघर्ष गरिरहेका थिए।
विराज, किरण र रोहितको अनुपस्थितिमा विक्रम लामाले नेपाली टिमको कप्तानी गर्ने सम्भावना छ। लामाले यसअघि पनि नेपाली टिमको उपकप्तानको जिम्मेवारी निभाइसकेका छन्।
मैत्रीपूर्ण खेल मलेसियाको जोहार शहरको पसार गुन्डाङ रंगशालामा हुनेछ।
नेपालले मलेसियन लिग च्याम्पियनसँग खेलेपछि विश्वकप छनोटका खेल खेल्नेछ।
नेपाल छनोट प्रतियोगिताको समूह ‘बी’ मा छ।
नेपालले भदौ १९ कुवेत र भदौ २४ गते चाइनिज ताइपेईसँग उनीहरुकै घरेलु मैदानमा खेल्नेछ। यस्तै नेपालले अस्ट्रेलियासँग क्यानबेरामा असोज २३ र असोज २८ मा जोर्डनविरुद्ध खेल्नेछ।
नेपाली टिम
गोलकिपर : विकेश कुथु, एलन न्यौपाने, विशाल श्रेष्ठ
डिफेन्डर : सरोज दाहाल, अजित भण्डारी, दिनेश राजवंशी, अनन्त तामाङ, देवेन्द्र तामाङ, रजिन धिमाल, सुमन अर्याल
मिडफिल्डर : सुनील बल, रवी पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई
फरवार्ड : विमल घर्तीमगर, विक्रम राना, अभिषेक रिजाल, नवयुग श्रेष्ठ
