सन् २०२२ मा कतारमा हुने फिफा विश्वकप र सन् २०२३ मा चीनमा एएफसी एसियन कपको संयुक्त छनोटअन्तर्गत नेपाल र कुवेतबीच अहिले खेल भैरहेको छ।
भुटानको चाङ्लिमिथाङ रंगशालामा भइरहेको खेलको पहिलो हाफ सकिदा नेपाल १–० ले पछि पारेको छ।
कुवेतका लागि अल मोटावाले २८ मिनेटमा डिबक्स बाहिरबाट उत्कृष्ट गोल गरे।
पहिलो हाफमा नेपालका रोहित चन्दले बराबरी गर्ने मौका गुमाए। उनले डिबक्स बाहिरबाट हानेको प्रहारलाई कुवेतका गोलकिपरले जोगाए।
दशरथ रंगशाला पुननिर्माण नसकिँदा नेपालले होमम्याचका रुपमा भुटानमा खेल खेल्नु परेको हो।
नेपालले छनोटमा सुरुवातीमा चार वटै अवे म्याच खेलिसकेको छ। जसमा नेपालले ३ खेलमा हार र १ खेलमा जित निकालेको छ।
पहिलो खेलमा कुवेतसँग ७-० ले पराजित नेपालले दोस्रो खेलमा चाइनिज ताइपेईलाई २-० ले पराजित गरेको थियो। नेपाललाई तेस्रो खेलमा अस्ट्रेलियाले ५-० र चौथो खेलमा जोर्डनले ३-० ले हराएका थिए। नेपाल ३ अंकका साथ समूहको चौथो स्थानमा छ।
कुवेत ४ खेलबाट ७ अंक जोडेर अंक तालिकाको दोस्रो स्थानमा छ। अघिल्लो खेलमा कुवेतले चाइनिज ताइपेईलाई ९–१ गोलले पराजित गरेको थियो।