सिन्धुपाल्चोकको पश्चिमी हिमाली गाउँ चिलाउनेखर्कमा एक यात्रुबस बुधबार बिहान दुर्घटना हुँदा कम्तिमा १५ जना मृतकको शव निकालिएको स्थानिय कुमार धितालले जनाएका छन् ।
धितालका अनुसार बस एकदमै अफ्ठेरो भिरमा खसेकोले धेरैको हताहत भएको हो । बसमा च्यापिएका अझै केहिलाई निकाल्ने प्रयास भइरहेको छ।
धितालका अनुसार दुर्घटनामा परेका थुप्रैलाइ उपचारको लागि अन्यत्र लगिएकाले घाइतेको संख्या यकिन हुन सकेको छैन । स्थानीयले अनुमानित ४० जना घाइते भएको हुनसक्ने जनाएका छन् । भोताङबाट काठमाडौं आउँदै गरेको बा२ख ३६४५ नम्बरको यात्रुबस बिहान सवा नौ बजे थाङपालकोट र थाङपालधाप गाविसको सीमामा पर्ने चिलाउनेखर्कमा दुर्घटना भएको हो।
बस सडकबाट सय मिटर तल खसेको छ । हालसम्म १५ जनाको शब निकालिएको छ । मृतकको संख्या अझै बढ्न सक्ने उद्दारमा संलग्न धितालले बताए ।
मानेखर्क चौकीबाट प्रहरी टोली घटनास्थल पुगिसकेको छ। बसमा करिव ७० यात्रु रहेको स्थानीयको अनुमान छ। घटनाको विस्तृत विवरण आउन बाँकी रहेको प्रहरीले जनाएको छ।
अहिले घाइतेहरुलाई उद्धार गरी स्थानीय भोताङ माविमा राखिएको र काठमार्डौँबाट हेलिकप्टर बोलाई त्यसतर्फ पठाउन थालिएको छ। घाइतेमध्ये २३ लाइ पहिलो चरणमा हेलिकोप्टरबाट राजधानी लगिसकिएको छ । सेनाको हेलिकोप्टरबाट थपलाइ पठाउने प्रयास जारी छ । त्यस ठाउँमा हिजो परेको पानीले बाटो बिग्रिएपछि एम्बुलेन्स जान नसकेको र घाइतेको उद्धारमा कठिनाइ भइरहेको प्रहरीले जनाएको छ।
आमा ह्योल्मो यातायातको सो बस भर्खरैको वर्षातले गर्दा हिलाम्मे कच्ची बाटोकै कारण दुर्घटनामा परेको अनुमान स्थानीयको छ । प्रहरीले भने अहिलेसम्म दुर्घटनाको यकिन कारण खुल्न नसकेको जनाएको छ। गाउँबाट आएको बस भएकाले यात्रुको यकीन संख्या पनि खुल्न सकेको छैन।
केहि यात्रु अहिले पनि बसमा च्यापिएरै रहेको हुनाले उद्धार प्रयास जारी छ ।
मृत्यु हुनेमा थाङपालकोट–३, का रणबहादुर पण्डित, सविना पण्डित, गीतादेवी बस्नेत, थाङपालकोट– ५ की मिठु सापकोटा, थाङपालकोट–६ का धने तामाङ, थाङपालकोट–९ का दमाइ तामाङ, गुन्सा–८ का छोटे बम्जन, भोताङ–२ का सिलेन तामाङ र बुधे तामाङ, भोताङ–३ का शेरबहादुर तामाङ, भोताङ– ८ का छिरिङ तामाङ र बरुवा– १ का मेन्दा तामाङ रहेका इलाक प्रहरी कार्यालय मेलम्चीले जनाएको छ ।