ओरेण्टल को–अपरेटिभ लिमिटेडबाट चार अर्बभन्दा बढी रकम हिनामिना भएको भन्दै निक्षेपकर्ताले तत्काल फिर्ता नगरिए कडा आन्दोलनको चेतावनी दिएका छन्।
रिपोर्टर्स क्लब नेपालमा पत्रकार सम्मेलन आयोजना गरी पीडित निक्षेपकर्ताहरुले सरकारले रकम फिर्ता गराउनेतर्फ ठोस कदम नचाले आन्दोलनमा जान वाध्य हुने चेतावनी दिएका हुन्।
'चार अर्बभन्दा बढी रकम हिनामिना गर्दा पनि सुनुवाई भएन,' निक्षेपकर्ताहरुका तर्फबाट हकहित संरक्षण समितिका संयोजक लोकेश्वर रन्जितले भने,'१० हजारभन्दा बढी निक्षेपकर्ताको रकम फिर्ता नभए कडा आन्दोलन गर्छौं।' पत्रकार सम्मेलनमा रन्जितले सरकारबाट जनताको धन संरक्षण नभए देशमा बैंकिङ क्षेत्रमा विश्वास गुम्ने र अर्थतन्त्रमा दुरगामी नकारात्मक असर पर्नसक्ने खतरा औल्याए।
पत्रकार सम्मेलनमा बोल्दै निक्षेपकर्ताहरुको हकहित संरक्षण समितिको सहसंयोजक समेत रहेकी प्राध्यापक अमुदा श्रेष्ठले देशको अर्थतन्त्रबाट नागरिक बचतको चार अर्ब रुपियाँ गायब पार्न लागिएकोतर्फ सरकार गम्भीर हुनुपर्नेमा जोड दिइन्। उनले प्रश्न गरिन्,'चार अर्ब निक्षेप कहाँ गयो?' देशको ढुकुटीबाट रकम हिनामिनाको क्रम बढिरहेकोबारे जनता सुसूचित र सजग हुने बेला आइसकेको बताइन्। नेपाल सरकारलाई ब्याजमा पाँच प्रतिशतको दरले अग्रिम कर कट्टी गरी वार्षिक तीन करोडभन्दा बढी राजश्व
दाखिला भएको संस्था अकस्मात् बन्द भएकोमा सम्बन्धित निकायहरुले अनुसन्धानमा चासो नदेखाएकोमा आश्चर्य व्यक्त गरिन्।
उनीहरुले निवृत्तिभरण र वरिष्ठ नागरिक भत्ता निक्षेप गरेको र त्यो गायब बनाएर आफूहरुमाथि अन्याय भएकोमा सरकारको ध्यानाकर्षण गराए। आम निक्षेपकर्ताहरुले राष्ट्रपति, उपराष्ट्रपति, मन्त्रिपरिषदका अध्यक्ष, सहकारी मन्त्री, अर्थमन्त्री, नेपाल राष्ट्र बैंक, उच्चस्तरीय कार्यदल, सहकारी विभाग, डिभिजन कार्यालयहरुले निक्षेपकर्ताहरुको हकहितमा आवश्यक कदम चाली न्याय दिलाउनुपर्नेमना ध्यानाकर्षण गराएका थिए।